Freiheit is nur a anders Wort
Blöchinger singt Kristofferson

2010 - aus rechtlichen Gründen unveröffentlicht
Leistungen anfordern
Diese CD darf aus Gründen des Copyrights nicht erscheinen. Alle Rechte an den Original-Songs verbleiben bei Kris Kristofferson bzw. bei Kris Kristofferson und den Co-Autoren der Lieder 1, 3 & 10 und/oder den jeweiligen Musikverlagen.

This CD may not be released due to copyright reasons. All rights of the original songs reserved by Kris Kristofferson or Kris Kristofferson and the co-authors of tracks 1, 3 & 10 and/or the respective publishers.
A Moment der Ewigkeit

A Moment Of Forever
Original Words & Music by Kris Kristofferson & Danny Timms

War’s was Bsonderes für di?
War’s a Gschenk für di, so wie’s für mi oans war?
Nur a Blick, und mir waren uns unendlich nah
Hast du gspürt: Des war Bestimmung?

Du warst jung gnug, daß d’ noch träumst
I war oid gnug, daß i noch was Neues lern
Für oan Moment der Ewigkeit hat ‘s Lebn uns gern
Und den kunn uns neamd mehr nehmen

Refrain:
Manchmal, wenn du woanst, san’s Freudentränen
Manchmal, i woaß, da woanst du
Einfach so
Einfach so

Ganz egal, was da noch kimmt
Daß a Traum wahr wird, is des ned wunderbar?
Für oan Moment der Ewigkeit waren mir uns nah
Und den kunn uns neamd mehr nehmen

Nochmals Refrain und letzte Strophe
 
Übersetzung / bavarian lyrics: © 2009 by Hank Blöchinger
Schiffbruch

Shipwrecked In The Eighties
Original Words & Music by Kris Kristofferson

Du kämpfst ganz verzweifelt, und ‘s Wasser steht dir bis zum Hals
Du hängst an dem, was dir noch bliebn is, des is dei Lebn
Es geht nix mehr weiter, und du fragst di: War des denn ois?
Und du suchst nach der Wahrheit: Soll’s wirklich koan Ausweg mehr gebn?

Und du denkst an a paar oide Freund’, denen du fest vertraut hast
Und wie du di umdrehst, erkennst, daß du ganz alloa bist
Vielleicht findst noch Spuren im Sand, auf den du amal baut hast
Und du fragst di auf amal, wieviel Zeit daß dir noch gebn is 

Du hast immer wieder mal glesn im Buch der Bücher
Du hast danach ghandelt, soweit sich danach handeln laßt
Doch du hast immer verlorn, und des soll dir jetzt zeign, daß es falsch war
Und du bist nah am Wahnsinnig-Werdn, weil du koan Halt mehr hast

Und du rufst: Himmel, kimm, hilf mir, wer immer aa da drobn is
Ois, was i will, is, daß neamd mei Lebn in Frage stellt
Wenn du kunnst, dann zeig mir an Weg aus meiner Finsternis
Gib mir an vernünftigen Grund, daß i weiter durchhalt
 
Übersetzung / bavarian lyrics: © 2009 by Hank Blöchinger
Freiheit is nur a anders Wort

Me And Bobby McGee
Original Words & Music by Kris Kristofferson & Fred Foster

Damals in Ingolstadt, mir habn an Zug versäumt
Noch übernachtig von der letzten Nacht
So stehn mir zwoa am Straßenrand, kurz bevor der Regn anfangt
Doch a Lastwagn hat uns dann bis Bad Hersfeld bracht
Unterwegs fangt Bobby zum Singen an, i nimm mei Mundharmonika in d’ Händ
Spiel leise mit, während a Sehnsucht in mir brennt
Und die Scheibenwischer gebn an Rhythmus vor, Bobby klatscht im Takt dazua
Und mir singen die Songs, die jeder Fernfahrer kennt

Refrain:
Freiheit is nur a anders Wort für nix habn zum Verliern
Nix is nix wert, und dafür wirf i ois hin
Es war so guat, wie mir gsungen habn, a Stückl Freiheit zum Probiern
Mehr habn mir ned braucht, Bobby und i
Es war gnug für mi und Bobby McGee

Von Hildesheim über Hamburg bis an Timmendorfer Strand
Habn mir ois, was uns bewegt hat, teilt
Mir waren füreinander da, an ganzen Sommer lang
Der oane war für’n andern der beste Freund
Dann irgendwo hinter Itzehoe habn mir uns dann verlorn
Er wollt endlich irgendwo dahoam sein
I gaab mei Zukunft bis in d’ Ewigkeit für oan Tag Vergangenheit
Wo s’ unsere Liader spieln, und er waar dabei

Refrain:
Freiheit is nur a anders Wort für nix habn zum Verliern
Und dafür werfert i noch mal ois hin
Es war so guat, wie mir gsungen habn, a Stückl Freiheit zum Probiern
Mehr habn mir ned braucht, Bobby und i
Es war gnug für mi und Bobby McGee
 
Übersetzung / bavarian lyrics: © 2009 by Hank Blöchinger
Sonntag in der Friah

Sunday Mornin' Comin' Down
Original Words & Music by Kris Kristofferson

I bin aufgwacht Sonntag in der Friah, und wieder mal hat mir der Kopf weh do
I hab a Hoibe trunken und mir dann denkt: Ah, oane trink i noch
Langsam bin i dann ins Bad und zieh mir mei oides Gwand von gestern an
Rasiert und kampelt bin i runter auf die Straß, naus in den neuen Tag

I hab mir oane anzündt und bin ziellos durch die fast leere Stadt
Da war a kloana Bua, der mit ‘ner leeren Bierdosn alloa Fußball gspielt hat
Und wie i dann über d’ Straß geh, riech i, daß da irgendwer a Hendl brat
Der Duft hat mi an was erinnert, des i irgendwo am Weg verloren hab

Refrain:
Wenn des Alloasein bsonders schwer is, dann am Sonntag in der Friah
A Sonntag hat was Familiäres, und du bist ganz alloa mit dir
Ob du jetzt lebst oder bald sterbn wirst, da stört sich heut koana dran
Weil du heut nirgendwo dazuaghörst, und der Sonntag fangt erst an

Im Park, da hat a Vater seiner kloana Tochter ‘s Radlfahrn beibracht
Vor einer Kirchn san Leut beinandergstandn, die habn gredt und mitnand glacht
I hab die Kirchenglocken zuaghört und mi dann langsam auf’n Hoamweg gmacht 
Mit jedem Schritt san s’ leiser wordn, wie die Hoffnung, von der i gestern noch träumt hab

Nochmals Refrain

Übersetzung / bavarian lyrics: © 2009 by Hank Blöchinger
In der Zeitung

In The News
Original Words & Music by Kris Kristofferson

In der Zeitung schreibn s’, da hat oana a junge Frau mißbraucht
Mit am Eisentrum beschwert, hat er s’ dann im See untertaucht
Und sie sinkt bis auf’n Grund, und mit ihr’m Kind, noch ungeborn
Geht a kloanes Wunder für immer verlorn

Und sie schreibn vom Regenwald und wie ‘s Ozonloch größer wird
Und von am Land, des man befreit, indem man’s einfach bombardiert
Und wehe, wer ned mitmarschiert, a Verräter is man gleich
A jeder spannt an Herrgott für sich ein

Hörst as woana? Siehst as sterbn?
In einer Welt, der nur noch Kriege heilig san
Vom Himmel donnert Tod und Verderbn
Und grad die, für die man kämpft, miassn dran glaubn

Kloane Kinder sterbn wie die Fliagn
Und jeden Tag werd wo a Hoamat ausradiert
Da lernt man’s Beten: »Warum laßt du des passiern?«
Doch der Herrgott, glaub mir, der kunn nix dafür

Refrain: 
Er sagt: »Mein Namen laßt’s aus’m Spiel
I will nur oans: daß euer Krieg endlich aufhört
Wenn oana sterbn muaß, weil a andrer des so will
Dann is des Lebn, des i euch gebn hab, ned viel wert«

A Lebn in Frieden, des bleibt a Traum
Für soviel Leut, die wolln, wie du und i, nur lebn 
Mir san Kinder, warum findn mir ned zamm?
Sogar der Vater woant, dem brauchst d’ Schuld ned gebn

Refrain: 
Er sagt: »Mein Namen, den laßt’s aus’m Spiel
I will nur oans: daß euer Krieg endlich aufhört
Wenn oana sterbn muaß, weil a andrer des so will
Dann is des Lebn, des i euch gebn hab, nix mehr wert«

Nochmals erste Strophe
 
Übersetzung / bavarian lyrics: © 2009 by Hank Blöchinger
Wo noch ois guat war

For The Good Times
Original Words & Music by Kris Kristofferson

Ned traurig sein, aa wenn’s vorbei is
Unser Lebn muaß weitergeh, aa wenn uns nix mehr zammhalt
Samma froh um die scheene Zeit, die uns gebn war
Es hat koan Sinn, daß man noch zuaschaun, wie alles zammfallt

Refrain:
Leg di her, grad so wie früher
I halt di warm, und i laß di heut ned alloa
Hör, wie der Wind die Regentropfen ans Fenster sanft herzuawaht
Und träum noch mal mit mir von der Zeit, wo noch ois guat war

I find mi scho z’recht, du findst an andern
Und i bin da, wenn du an Freund brauchst und sonst koan hast
Sag heut nix mehr, was warten kunn und Zeit bis morgn hat
Mir habn Zeit gnug zum Traurigsein, wennst mi alloalaßt

Refrain:
Leg di her, grad so wie früher
Halt mi warm und bitte laß mi heut ned alloa
Hör, wie der Wind die Regentropfen ans Fenster sanft herzuawaht
Und träum noch mal mit mir von der Zeit, wo noch ois guat war
 
Übersetzung / bavarian lyrics: © 2009 by Hank Blöchinger
Billy Dee

Billy Dee
Original Words & Music by Kris Kristofferson

Billy Dee war noch a Kind und doch scho oanazwanzg
Er hat sich gern mit’m Feuer gspielt und auf jeder Feier tanzt
Er hat gsagt, um jede Chance, die man ned nutzt, is’s schad
Es war wie a Sucht nach Lebn, die koa Mensch verstanden hat
Jede Nacht is er um d’ Häuser zogn, hat jede Kneipn kennt
Bei Liebe, Lust und Laster war er in sei’m Element
Manche Leut habn gsagt, der Spinner is ned ganz normal
Mir waren stolz auf Billys Freundschaft, und ois andre war egal

Er is sein Weg gangen und hat des gsagt, was er moant
Jedes Wort der Warnung war von vornherein verlorn
Mit immer neue Freund’, da hat er jeden Schmarrn mitgmacht
Hat immer an des Guate glaubt und sich nix dabei dacht
Die Nadel hat der Deife gsehn, die bringt di himmelwärts
Jeder Stich in seine Arm war für mi wie a Stich ins Herz
A paar habn gmoant, der fällt so lang auf d’ Schnauzn, bis er’s lernt
An jedem hat er leid tan, aber gholfn hat eahm neamd

Er war a Seele von am Menschn, er hat nie bös von oam dacht
Hat Liader gsungen, Witze gmacht, so manche lange Nacht
Er hat gsagt, sie is doch eh scho traurig gnug, die Welt
Wie einsam daß er in sich war, des hat er koam verzählt
Gestern habn s’n gfundn, in sei’m Bett, noch halbert warm
Alle viere von eahm gstreckt, die Nadel noch im Arm
Manche sagn, er hätt’ sich umbracht, und die’n liegn haben sehn
Sagn, Billys Lebn is bis in’n Tod nei nur oa Kreuzweg gwen
 
Übersetzung / bavarian lyrics: © 2009 by Hank Blöchinger
Regenbogen

Here Comes That Rainbow Again
Original Words & Music by Kris Kristofferson

A kloanes Café an der Landstraß’
Die Kellnerin spült grad ‘as Gschirr
A Fernfahrer trinkt a Tass’ Kaffee
Zwoa kloane Buam stehn an der Tür
Sie schaun auf des Glas mit die Guattl
Und gehngan zur Kellnerin vor
»Mir habn miteinand nur a Zehnerl«
Sie sagt: »Na, dann nehmt’s euch halt zwoa!«

Refrain:
Und draußen hat’s gwittert und donnert
Und langsam werd jetzt wieder Licht
Und der Regenbogen am Himmel
Hat manchmal a menschliches Gsicht

Der Fernfahrer sagt zur Bedienung
Nachdem die zwoa Buam gangen san:
»Die kosten doch mehr als a Zehnerl.«
»Und wenn scho!« sagt sie. »Ja, was dann?«
Er sagt nix und schaut in sei Tass’ nei
Legt’s Geld auf’n Tisch und trinkt aus
Sie sagt: »Hey, da kriagst noch was aussa!«
»Und wenn scho!« sagt er und geht naus

Nochmals Refrain

Der Regenbogen am Himmel
Hat manchmal a menschliches Gsicht
 
Übersetzung / bavarian lyrics: © 2009 by Hank Blöchinger
Bitte bleib die Nacht bei mir

Help Me Make It Through The Night
Original Words & Music by Kris Kristofferson

Draußen werd’s allmählich Nacht 
Doch i seh nur noch deine Augn 
Egal, was uns heut zammabracht 
Laß uns einfach blind vertraun

Laß uns zueinanderlegn
Laß uns träumen, laß uns redn 
Was du ned willst, werd ned passiern 
Bitte bleib die Nacht bei mir

Was richtig is, is mir egal
I woaß, es gibt nix zum Verzeihn
Von mir aus geht die Welt morgn unter
Doch heut Nacht brauch i an Freund 

Gestern is vorbei, und morgn
Soll uns heut ned interessiern 
I bin ned gern alloa dahoam 
Bitte bleib die Nacht bei mir

Wer is scho gern alloa dahoam 
Bitte bleib die Nacht bei mir

Übersetzung / bavarian lyrics: © 2009 by Hank Blöchinger
Melancholie

Epitaph (Black And Blue)
Original Words & Music by Kris Kristofferson & Donnie Fritts

Sie stehngan beinander
Es tuat eahna weh 
Im Schmerz haltn s’ zamma
Die Einsicht kimmt spät
Jetzt, wo du gstorbn bist
Kommen s’ daher 
Jetzt, wo dei Lebn verlorn is
Brauchst du koan Freund mehr 

Und mancher bereut was
Trinkt zamm und geht hoam 
Was du wem bedeut hast 
Kunn dir neamd mehr zeign

Dei Lebn war dir vorgebn
Weit weg von dahoam 
Du bist immer alloa gwen
Und ganz alloa gstorbn 

Du hast träumt von am Lebn
Des ned bestimmt war für di 
Du warst immer umgebn 
Von deiner Melancholie 
Du warst immer umgebn 
Von Melancholie

Übersetzung / bavarian lyrics: © 2009 by Hank Blöchinger
An Deife gsehn

To Beat The Devil
Original Words & Music by Kris Kristofferson

Spätabends in einer Bar, am Tresen sitzt a oider Mann
Beim Einakommen siehg i scho, er schaut mi seltsam an
Er schaut auf mei Gitarr’, und dann fragt er: »Spielst heut noch?«
I sag: »I brauch jetzt erst amal a Bier.«
Er ladt mi ei und nickt mir zua: »‘as Lebn is ned so leicht
Wenn des, was du am Abend hoambringst, vorn und hint ned reicht.«
Und dann nimmt er mei Gitarr’, und wie er über d’ Saiten streicht
Singt er nur für mi alloa a Liad:

Refrain:
»Du vertust doch nur dei Zeit, indem du Liader singst für Leut
Die ned hörn wolln, was d’ zum Sagn hast, weil zum Denken san s’ zu miad
Du kunnst noch im Sterbn erklärn, daß des, worüber sie sich bschwern
Zu ändern waar, wenn man nur will, doch wen moanst, daß des interessiert?
Des habn scho andere probiert, die habn s’ genauso ignoriert
Oder niedergmacht für eahna Lebensgfui
Und ihre Stimmen san verweht wie Blattl, die der Wind verstreut
Nur die Wahrheit bleibt, die koana wissn will«

Der Oide war a Fremder, doch sei Liad hab i scho kennt
Des hab i so oft ghört, des hat sich in mei Herz neibrennt
Hinter jeder Mauer, an der i mir an Kopf angrennt
Und im Refrain habn s’ alle bitter glacht
Wenn du nur tief gnug unten bist, hat di der Deife gsehn
Und dem geht’s um jedes noch so armselige Lebn
I hab ‘n zwar ned besiegt, doch er hat mir a Bier ausgebn
Und dann hab i mir auf sei Liad mein Reim drauf gmacht:

Refrain:
Du kunnst mi noch immer hörn, aa wenn d’ Leut immer mehrer werdn
Die ned hörn wolln, was i sagn will, weil sich’s Zuahörn ned rentiert
Und i werd noch im Sterbn erklärn, daß des, worüber sie sich bschwern
Zu ändern waar, wenn man nur will, vielleicht, daß’s doch oan interessiert
I bin geborn, um so zu werdn, und grad so einsam werd i sterbn
Aber vorher sing i mir ‘s Herz aus’m Leib
Und is mei Singen ganz umsonst, weil s’ sagn: »Sag, woaßt, was du uns konnst?«
Dann glaub i trotzdem ned, daß i umasonst schreib

Übersetzung / bavarian lyrics: © 2009 by Hank Blöchinger
Hast du a greislichs Gfrieß

I Hate Your Ugly Face
Original Words & Music by Kris Kristofferson

Man hört von unglücklich Verliebte, wenn s’ verlassen werdn
Sie san treu und ergebn ihr Lebn lang, i kunn’s scho nimmer hörn
Denn i woan ned in mei Bier, und des oane sag i dir, damitst as nie vergißt:
Der schönste Tag in mei’m traurigen Lebn war, wie du gangen bist

Hast du a greislichs Gfrieß
Mit dir is’s nur a Gschieß
Des geht mir nach, wo immer i hinroas
Dei Haut is wie aus Leder
Du schaust aus wie a Wetter-Hex
I pack di ned, damitst as endlich woaßt

So mancher wünscht sei’m Schatzi Glück, lauft s’ eahm für immer fort
I hoff, du bist unglücklich, du schiache Mißgeburt
Naa, i woan ned in mei Bier, und des oane sag i dir, damitst as nie vergißt:
Der schönste Tag in mei’m traurigen Lebn war, wie du gangen bist
Der schönste Tag in mei’m traurigen Lebn war, wie du gangen bist
 
Übersetzung / bavarian lyrics: © 2009 by Hank Blöchinger